Alme Vincenti, veneranda cuius
haec dies totum colitur per orbem,
quas sibi cantat chorus hic fidelis
accipe laudes.
Rite mox annis teneris peractis
Praedicatorum sitiens adisti
Ordinem servans documenta patrum
mente pudica.
Tactus e coelis operam dedisti
litteris sacris utriusque legis
quas docens verbo fidei replesti
lumine mundum.
Inde ferventer cito iam propinquum
saeculi finem fore nuntiasti
ut Deum gentes timeant patenter
vociferando.
| Angelus alter penitus fuisti
ille qui coeli medium volabat
nuntians cunctis populis et linguis
Iudicis horam.
Lingua quae sancta populos docebas
rebus et signis variis probabas
languidis reddens cruce sanitatis
robora membris.
Inter electos modo collocaris
semper in coelis merito triumphans
fulgidis sertis redimitus omni
tempore saecli.
Summa sit Christo salus et perennis
gloria Patri pariterque Sancto
Flamini quorum sine fine virtus
regnat in orbe.
|